الحل المثالي

انطفـى نـور الشوارع والثوانـي عاتبتني
أظلمت كل المدينه من جنوب ومن شمالي

صرخة الطفل وكلام أمه/ لفتني ما لفتني
والنجم تخفيه غيمه تعتلي فــوق العلالي

يا أميره كم أميره مـن بعد وصلك دعتني
لـكن الخاطر قطع عهدٍ على طول الليالي

ما امـر دار الغرام اللـي مخاوفها خذتني
من معاليقي الى بحرٍ شفت موجه طوالي

مركبـي فيهـا تحطم/ لكن أمواجه رمتني
عند دارٍ مـا بقى فيها سوى ذيك الرمالي

لا بشر فيها لقيت ولا بشــر فيها لقتنــي
بعدها زال النظر من عيني الثنتين زالـي

العجاف سنين ظلمى لو بقربك ما عمتني
كنّها حطّت على عيني مثل كف الضـلالي

هـي خمس لكن كلت حلمي وتاليها كلتني
من رحلتي/لا ولا حتى رغبتي في وصالي

يا أميـره جملة اعـذارك/ بشده أَزعٓجتني
يــوم قلتي مُفترقنا/ يمكن الحل المثالي

كـم انا قلت الوسيعه دون قربك ما كفتني
كم انا قلت الخفافي دون قربك هي ثقالي

يا أميـره/ الهمــوم اسهم رميتيها وجتني
الهمـوم اثقـل ثقيلة شلتها مثـل الجبالـي

من بعد صدفه بليتيني/ وغيرك/ ما بلتني
يا أميـره مـن رحلتـي ما بقيت إلا لحالـي

مـن شبابـي زهـرةٍ ذبلت بعد مـا اذبَلتني
بين امطار الشتـا/ مكتوب ما تمطر قبالي
************************

أرض الهوى

أرض الهوى جنّه كبيره من ورى هالباب
سكّانها في سالف اوقـات الزمن وافين

بسمة رضاهم مـا بقت في راية الاحباب
من حسنها بسمة رضـاهم ما بقت للحين

يرميهم الماضــــي ويملي عينهم بتراب
والحين شفْهم من جلابيب الـــوفا عارين

يتشبثوا في بعضهم ثم يرجعوا اغـــراب
اعمتهم الارض العظيمه عــــنبها والتين

هم كلهم من سيف قطّاع الوصل منصاب
بعد الغلا فوق الغلا هـم يصبحوا قاسين

هذا انا لو لا الهرب مـــن بينهم باعجاب
كان القوي لا جاع فيهم ياكــل المسكين

مسكين مخدوع البصر حتى دخل هالباب
ضامين عشّاق الهوى في ارضهم ضامين

جيفر القرطوبي